မြေပြင်အကူအညီလိုအပ်သူများနှင့် အလှူရှင်များ တိုက်ရိုက်ချိတ်ဆက်ပေးမယ့် Hope Hands
မြန်မာနိုင်ငံမှာ မန္တလေးမြို့အနီးကို ဗဟိုပြုပြီး ရစ်ချက်တာစကေး ၇ ဒဿမ ၇ အဆင့်ရှိတဲ့ အင်အားပြင်းငလျင် မတ်လ (၂၈) ရက်နေ့မှာ လှုပ်ခပ်ခဲ့ပြီးနောက်ပိုင်း နိုင်ငံတဝန်းမြို့နယ်အများစုမှာ အသက်ဆုံးရှုံးမှု၊ ထိခိုက်ဒဏ်ရာရမှုတွေများပြားခဲ့ပြီး မြို့နယ်အများစုမှာလည်း ပျက်စီးဆုံးရှုံးမှုတွေ များပြားလျက်ရှိပါတယ်။ ထိခိုက်ပျက်စီးပြီး အကူအညီလိုအပ်နေတဲ့ နေရာတွေများလွန်းတဲ့အတွက် မြေပြင်အကူအညီလိုအပ်သူတွေနဲ့ ကူညီပေးနိုင်မယ့် အလှူရှင်တွေကို တိုက်ရိုက်ချိတ်ဆက်ပြီး နောက်ဆုံးရသတင်းတွေကို ဝင်ရောက်ကြည့်ရှုနိုင်ဖို့ Softnovations အနေနဲ့ hopehands.info website တစ်ခု ကိုဖန်တီးခဲ့ကြပါတယ်။
Hopehands ဆိုတာကတော့ ငလျင်ဘေးကြောင့် အကူအညီလိုအပ်နေတဲ့သူတွေကို အကူအညီပေးနိုင် ဖို့အတွက် အလှူရှင်တွေနဲ့ အလှူခံပုဂ္ဂိုလ်တွေကို ချိတ်ဆက်ရှာဖွေပေးနိုင်မယ့် သတင်းအချက်အလက် တွေ စုစည်းရာနေရာတစ်ခုဖြစ်ပါတယ်။
Website ထဲမှာ အလှူရှင်တွေအနေနဲ့ ကိုယ်နေထိုင်တဲ့ ပြည်နယ်နှင့် တိုင်းဒေသကြီး၊ လှူဒါန်းနိုင်တဲ့ ပစ္စည်းအမျိုးအစားတွေကို ကိုယ်တိုင်ထည့်သွင်းဖော်ပြပေးထားနိုင်မှာ ဖြစ်ပါတယ်။ မြေပြင်အကူအညီ လိုအပ်ပြီး အကူအညီတောင်းခံသူတွေအနေနဲ့လည်း လတ်တလောအချိန်မှာ အလိုအပ်ဆုံးဖြစ်တဲ့ ငွေကြေး၊ ကရိန်း၊ ဆေးဝါး၊ အစားအသောက်၊ ရေသန့်၊ Dead Body အိတ်၊ ဖုန်းဘေ၊ အဝတ်အထည်နှင့် ကယ်ဆယ်ရေးပစ္စည်း အစရှိတာတွေကို ရွေးချယ်ပြီး အကူအညီတောင်းခံနိုင်ပါတယ်။ အလှူရှင်နဲ့ အကူအညီလိုအပ်သူတွေကို တိုက်ရိုက်ချိတ်ဆက်နိုင်ဖို့အတွက် ဆက်သွယ်ရမည့် ဖုန်းနံပါတ်၊ Viber နဲ့ Telegram အကောင့်တွေကိုလည်း ကိုယ်တိုင်ကိုယ်ကျထည့်သွင်းနိုင်ဦးမှာ ဖြစ်ပါတယ်။ ကိုယ်စား ထည့်သွင်းပေးဖို့အတွက်ဆိုရင်လည်း Softnovations နဲ့ Hopehands Facebook Page ကို ဆက်သွယ်နိုင်တယ်လို့ သိရပါတယ်။
HopeHands အသုံးပြုပုံနှင့် အချက်အလက်ထည့်သွင်းပုံ
Image: Hopehands
Softnovations အနေနဲ့ Hopehands မှာ အကြုံပြုလိုတာပဲဖြစ်ဖြစ်၊ Web Developer, UI/UX Designer နဲ့ Investor အနေနဲ့ ပါဝင်လိုတာပဲဖြစ်ဖြစ် ပူးပေါင်းပါဝင်ဖို့လည်း ဖိတ်ခေါ်ထားတဲ့အတွက် အသေးစိတ် ထပ်မံသိရှိလိုတဲ့အတွက်အလက်တွေကို Softnovations နဲ့ Hopehands Facebook Page မှာ မေးမြန်းစုံစမ်းနိုင်ပါတယ်။
