အူရီဒူးမြန်မာမှ မြန်မာအမျိုးသမီးငယ်များကို ဒစ်ဂျစ်တယ်နှင့် ခေါင်းဆောင်မှု အရည်အသွေးများ မြှင့်တင်ပေးရန် Tech Age Girls Myanmar (နည်းပညာခေတ်ရဲ့ ပျိုမေများ) အစီအစဥ် ၂၀၂၃-၂၀၂၄ ကို ဆက်လက်ပံ့ပိုး

အူရီဒူးမြန်မာက အသက် ၁၆ မှ ၂၂ နှစ်အတွင်းရှိ မြန်မာအမျိုးသမီးငယ်များကို ဒစ်ဂျစ်တယ်နှင့် ခေါင်းဆောင်မှု အရည်အသွေးများ မြှင့်တင်ပေးနိုင်ရန်ရည်ရွယ်ကာ Tech Age Girls Myanmar (နည်းပညာခေတ်ရဲ့ ပျိုမေများ) အစီအစဥ် ၂၀၂၃-၂၀၂၄ ကို ဆက်လက်ပံ့ပိုးကူညီသွားမည်ဖြစ်သည်။ ယခုနှစ် Tech Age Girls Myanmar အစီအစဥ်တွင် ဧရာဝတီတိုင်း၊ ပဲခူးတိုင်း၊ မကွေးတိုင်း၊ မန္တလေးတိုင်း၊ ရခိုင်ပြည်နယ်၊ စစ်ကိုင်းတိုင်း၊ ရှမ်းပြည်နယ်၊ တင်္နသာရီတိုင်းနှင့် ရန်ကုန်တိုင်းတို့ရှိ စာကြည့်တိုက် ၃၃ ခုတွင် အမျိုးသမီးငယ် အယောက် ၂၀၀ အထိ လက်ခံသင်ကြား ပေးသွားမည်ဖြစ်သည်။

Image: ooredoo

Tech Age Girls Myanmar (နည်းပညာခေတ်ရဲ့ ပျိုမေများ) အစီအစဥ်သည် တစ်နှစ်ခန့်ကြာမြင့်မည်ဖြစ်ပြီး ယနေ့ဒစ်ဂျစ်တယ်ခတ်တွင် နည်းပညာနှင့် ခေါင်းဆောင်မှုစွမ်းရည်ပြည့်ဝသော အမျိုးသမီးများ ပေါ်ထွက်လာစေရန် ရည်ရွယ်ဆောင်ရွက်သည့် အစီအစဉ်တစ်ခုဖြစ်သည်။ ဤအစီအစဥ်မှတစ်ဆင့် မြန်မာနိုင်ငံတွင် ဒစ်ဂျစ်တယ်ပိုင်းဆိုင်ရာ ကျား မ ကွာဟချက်များကို လျှော့ချကာ အမျိုးသမီးငယ်လေးများအနေဖြင့် ဒစ်ဂျစ်တယ်ကဏ္ဍအတွက် လိုအပ်သည့် စွမ်းရည်များ ပိုင်ဆိုင်ကာ မိမိတို့ လူမှုပတ်ဝန်းကျင်အသီးသီး ဖွံ့ဖြိုးတိုးတက်ရေးတို့အတွက် နည်းပညာကို အကောင်းဆုံး အသုံးချဆောင်ရွက်နိုင်မည်ဖြစ်သည်။ သင်တန်းတက်ရောက်သူများသည် ခေတ်မီအသက်မွေးဝမ်းကျောင်းပညာရေး၊ ပူးပေါင်းဆောင်ရွက်ခြင်းနှင့် နည်းပညာအခြေပြု သင်ကြားမှုများဖြင့် ယုံကြည်မှုရှိပြီး အရည်အချင်းပြည့်မီသူများအဖြစ် လူ့အဖွဲ့အစည်းကို ပြန်လည်းအကျိုးပြု ပံ့ပိုးနိုင်မည်ဖြစ်သည်။

မြန်မာအမျိုးသမီးငယ်များကို စွမ်းဆောင်ရည်မြှင့်တင်ပေးရန် အားထုတ်ကြိုးပမ်းမှုများနှင့်အတူ ၎င်းအစီအစဥ်ကို ၂၀၁၆ ခုနှစ်မှ စတင်၍ အကောင်အထည်ဖော်ဆောင်ရွက်ခဲ့ကာ နှစ်စဥ် အမျိုးသမီးငယ် အယောက် ၁၀၀ ကို သင်တန်းပေးလာခဲ့ရာမှ အောင်မြင်မှုအသီးအပွင့်များကို ထင်ထင်ရှားရှား မြင်တွေ့ခဲ့ရသောကြောင့် အူရီဒူးမြန်မာသည် ၂၀၁၉ ခုနှစ်မှ စ၍ သင်တန်းအတွက် အဓိကထောက်ပံ့သူဖြစ်လာခဲ့သည်။ အူရီဒူးမြန်မာအ‌နေဖြင့် Tech Age Girls Myanmar (နည်းပညာခေတ်ရဲ့ ပျိုမေများ) အစီအစဉ်၏ အကျိုးရှိမှုကို တွေ့မြင်ခဲ့ရသောကြောင့် အဆိုပါ အစီအစဥ်အတွက် ၂၀၂၀ ပြည့်နှစ်မှစ၍ သင်တန်းတက်ရောက်နိုင်သူသူဦးရေကို နှစ်ဆတိုးမြှင့်လက်ခံပေးရန် လိုအပ်သည်များ ပိုမိုပံ့ပိုးပေးခဲ့သည်။ ဤကဲ့သို့ ပံ့ပိုးကူညီပေးခြင်းအားဖြင့် နှစ်စဉ် ထူးချွန်ထက်မြက်သည့် အမျိုးသမီးငယ် အယောက် ၂၀၀ ကျော်ကို ပိုမိုကောင်းမွန်သည့် အနာဂတ်အတွက် မရှိမဖြစ်လိုအပ်သော ဒစ်ဂျစ်တယ်နှင့် ခေါင်းဆောင်မှုစွမ်းရည်များကို တတ်မြောက်ပိုင်ဆိုင်နိုင်စေမည့် Tech Age Girls Myanmar (နည်းပညာခေတ်ရဲ့ ပျိုမေများ)  အစီအစဉ်တွင် ပါဝင်နိုင်ရန် အခွင့်အလမ်းများ ရရှိစေခဲ့သည်။

အူရီဒူးမြန်မာ၏ Head of Corporate Communications ဖြစ်သူ ဦးတင့်နိုင်ထွဋ်က Tech Age Girls (နည်းပညာခေတ်ရဲ့ ပျိုမေများ)  အစီအစဉ်ကို ပံ့ပိုးပေးခြင်းနှင့်ပတ်သတ်ပြီး “မြန်မာနိုင်ငံမှာ Tech Age Girls အစီအစဉ်ကို အကောင်အထည်ဖော် ဆောင်ခွင့်ရရှိနိုင်ဖို့ နှစ်စဉ် ဆက်လက်ပံ့ပိုးခွင့်ရတဲ့အတွက် ဝမ်းသာ ဂုဏ်ယူမိပါတယ်။ မြန်မာအမျိုးသမီးငယ်လေးတွေကို ဒစ်ဂျစ်တယ်စွမ်းရည်နဲ့ ခေါင်းဆောင်မှုပိုင်း ဖွံ့ဖြိုးတိုးတက်ရေး အခွင့်အလမ်းတွေ အလေးထား ဖန်တီးပေးခြင်းဟာ လူတစ်ဦးတစ်ယောက်တည်းကိုသာမက ကျွန်တော်တို့ လူမှုအသိုင်းအဝိုင်းရဲ့ တိုးတက်မှုနဲ့ သာယာဝပြောရေးကိုပါ ပံ့ပိုးမြှင့်တင်ပေးရာကျတယ်လို့ ယုံကြည်ပါတယ်” ဟု စိတ်အားထက်သန်စွာဖြင့် ထုတ်ဖော်ပြောကြားခဲ့သည်။

အူရီဒူးမြန်မာမှ ပံ့ပိုးပေးထားပြီး Succor Foundation မှ စီစဉ်ဆောင်ရွက်သည့် ၎င်းအစီအစဥ်သည် မြန်မာနိုင်ငံတွင် ဒစ်ဂျစ်တယ်ပိုင်းဆိုင်ရာ ကျား မ ကွာဟချက်များနှင့် ဒစ်ဂျစ်တယ် ကွဲပြားခြားနားမှုများအကြား ပေါင်းကူးဆက်သွယ်ကာ ဒစ်ဂျစ်တယ် နည်းပညာခေတ်တွင် မိမိတို့၏ လူမှုအသိုင်းအဝိုင်းအသီးသီးကို ပြန်လည်အကျိုးပြုမည့် ထူးချွန်သည့် အမျိုးသမီးငယ်လေးများကို မွေးထုတ်ရန် ရည်ရွယ်သည်။

Image: ooredoo

Tech Age Girls Myanmar (နည်းပညာခေတ်ရဲ့ ပျိုမေများ) အစီအစဥ်တွင် အပိုင်း (၃) ပိုင်း ပါဝင်ပြီး အမျိုးသမီးငယ်‌လေးများ၏ လူမှုဘဝတိုးတက်ရေးအတွက် လိုအပ်သည့် စွမ်းရည်များ လေ့ကျင့်သင်ကြားပေးသွားမည် ဖြစ်သည်။ ပထမပိုင်းတွင် ဒစ်ဂျစ်တယ်နည်းပညာပိုင်းဆိုင်ရာ ကျွမ်းကျင်မှုများ၊ ဒုတိယပိုင်းတွင် ခေါင်းဆောင်မှုစွမ်းရည်၊ အသင်းအဖွဲ့လိုက် ဆောင်ရွက်ခြင်း၊ စီမံကိန်းများအား စီမံခန့်ခွဲခြင်း၊ ဆန်းသစ်စွာ တွေးခေါ်ခြင်း၊ ဖန်တီးနိုင်စွမ်းရှိပြီး ကျိုးကြောင်းဆီလျော်စွာ တွေးခေါ်ခြင်း၊ ရပ်ရွာအကျိုးပြုစီမံကိန်းများကို စီစဉ်ဆောင်ရွက်ခြင်းဆိုင်ရာ လေ့ကျင့် သင်ကြားမှုများစသဖြင့် လုပ်ငန်းဆောင်ရွက်မှုပိုင်းဆိုင်ရာနှင့် အများနှင့် ဆက်သွယ်ဆောင်ရွက်ရာတွင် လိုအပ်သည့် ကျွမ်းကျင်မှုများကို လေ့ကျင့်သင်ကြားမှုများပြီးနောက် အမျိုးသမီးငယ်လေးများအနေဖြင့် မိမိတို့ ကိုယ်တိုင် ရေးဆွဲထားသည့် ရပ်ရွာအကျိုးပြုစီမံကိန်းများအား တင်ဆက်ရမည်ဖြစ်ပြီး နောက်ဆုံးအဆင့် ထူးချွန်သည့် သင်တန်းသူ ၄၀ ဦး‌ကို ရွေးချယ်သွားမည်ဖြစ်သည်။ တတိယပိုင်းတွင် ရွေးချယ်ခံရသူများအနေဖြင့် ခေါင်းဆောင်မှုထိပ်သီး အစည်းအဝေး တက်ရောက်ရမည်ဖြစ်ပြီး မိမိတို့ နေရပ်ဒေသအသီးသီးအတွက်  ရပ်ရွာအကျိုးပြုစီမံကိန်းများ ပြန်လည် ဖော်ဆောင်နိုင်ရန်အတွက် အထူးလေ့ကျင့်ရေးသင်တန်များနှင့် ဆွေးနွေးဆောင်ရွက်ခြင်းများ ပြုလုပ်ပေးသွားမည် ဖြစ်သည်။

Tech Age Girls Myanmar (နည်းပညာခေတ်ရဲ့ ပျိုမေများ) အစီအစဥ်တွင် ပါဝင်တက်ရောက်သူများသည် စနစ်တကျ ပြင်ဆင်ဆောင်ရွက်ထားသည့် လေ့ကျင့်မှုများမှ တစ်ဆင့် လူမှုဆက်ဆံရေးစွမ်းရည်မှစ၍ နည်းပညာဆိုင်ရာ ပရော်ဖက်ရှင်နယ် လုပ်ငန်းကျွမ်းကျင်မှုစွမ်းရည်အထိ လေ့လာသင်ယူနိုင်မည်ဖြစ်သည်။ ယခုသင်တန်း အစီအစဥ်တွင် ပါဝင်သူများသည် မိမိတို့၏ လူမှုဝန်းကျင်အသီးသီးမှာ အရည်အချင်းပြည့်ဝသော အနာဂတ်ရဲ့ ခေါင်းဆောင်များအဖြစ် တာဝန်ယူဆောင်ရွက်စေနိုင်ရန် ယုံကြည်မှုနှင့် စိတ်ဓာတ်ခွန်အားတို့ကို မြှင့်တင်ပေးရန် မျှော်လင့်ထားသည်။