ကမ္ဘောဇဘဏ်က ပြည်တွင်းအခြားဘဏ်များသို့ ဒစ်ဂျစ်တယ်စနစ်ဖြင့် ငွေလွှဲနိုင်သည့် “Other Bank Transfer” လုပ်ဆောင်ချက်အား မိတ်ဆက်

ကမ္ဘောဇဘဏ်သည် ၎င်း၏ အင်တာနက်ဘဏ်ဝန်ဆောင်မှု (iBanking) နှင့် မိုဘိုင်းဘဏ်ဝန်ဆောင်မှု (mBanking) အသုံးပြုသူများအတွက် မြန်မာနိုင်ငံအတွင်းရှိ အခြားဘဏ်ကြီးများ၏ အကောင့်ပိုင်ရှင်များထံသို့ ဒစ်ဂျစ်တယ်စနစ်ဖြင့် ငွေလွှဲနိုင်မည့် “Other Bank Transfer” လုပ်ဆောင်ချက်အား စတင်မိတ်ဆက်လိုက်ပြီဖြစ်ကြောင်းသိရသည်။
ကမ္ဘောဇဘဏ်၏ လုပ်ငန်းသုံး ဘဏ်အကောင့်နှင့် ကိုယ်ပိုင်ဘဏ်အကောင့် ရှိထားသူတိုင်း ၂၄ နာရီ၊ ၇ ရက်ပတ်လုံး အချိန်မရွေး အသုံးပြုနိုင်သော အဆိုပါငွေလွှဲဝန်ဆောင်မှုသည် ငွေလွှဲမှုတစ်ကြိမ်လျှင် အများဆုံး မြန်မာကျပ်ငွေ ၁,၀၀၀,၀၀၀ ထိ ငွေလွှဲနိုင်ပြီး တစ်နေ့လျှင်အများဆုံးငွေလွှဲနိုင်သည့်ပမာဏအား မြန်မာကျပ်ငွေ ၅,၀၀၀,၀၀၀ အဖြစ်သတ်မှတ် ထားပါသည်။ ငွေလွှဲလုပ်ဆောင်ချက် တစ်ခုကို (၁၅) မိနစ်ထက် မကြာစေဘဲ ဆောင်ရွက်နိုင်မည်ဖြစ်သောကြောင့် ငွေလွှဲရန်အတွက် ငွေသား (သို့မဟုတ်) ချက်လက်မှတ်ဖြင့် ဘဏ်ခွဲသို့ သွားရောက်ရမည့် အချိန်ကို အကျိုးရှိရှိ အသုံးချနိုင်မည် ဖြစ်ပါသည်။ ငွေလွှဲလုပ်ဆောင်ချက် အားလုံးကို PIN နံပါတ် (သို့မဟုတ်) တစ်ခါသုံးလျှို့ဝှက်နံပါတ်များဖြင့် ကာကွယ်ထားပြီး ငွေလွှဲပြောင်းမှုအတွက် အတည်ပြုသည့် SMS စာတိုအား (၁၀) မိနစ်အတွင်း လက်ခံရရှိမည် ဖြစ်သည်။
၂၀၂၀ ခုနှစ်၊ ဒီဇင်ဘာလ၊ ၁၄ ရက်နေ့မှစတင်ပြီး ကမ္ဘောဇဘဏ်ဝန်ဆောင်မှု အသုံးပြုသူများသည် ‘Other Bank Transfer’ လုပ်ဆောင်ချက်ဖြင့် မြန်မာရှေ့ဆောင်ဘဏ် (MAB)၊ ရိုးမဘဏ်၊ ယူနိုက်တက်အမရဘဏ် (uab)၊ မြဝတီဘဏ်၊ ကျေးလက်ဖွံ့ဖြိုးရေးဘဏ်နှင့် A bank တို့၏ အကောင့်ပိုင်ရှင်များထံသို့ ဒစ်ဂျစ်တယ်စနစ် အသုံးပြု၍ လွယ်ကူသက်သာ၊ မြန်ဆန်စွာ ငွေလွှဲနိုင်ပြီ ဖြစ်ပါသည်။ လာမည့် အနာဂတ်ကာလများတွင် အခြားဘဏ်များကိုလည်း ကမ္ဘောဇဘဏ်၏ Other Bank Transfer ဒစ်ဂျစ်တယ်ဝန်ဆောင်မှုနှင့် ချိတ်ဆက်သွားမည် ဖြစ်သည်။

Photo Source https://www.facebook.com/KanbawzaBank

ကမ္ဘောဇဘဏ် ဝန်ဆောင်မှုအသုံးပြုသူများအနေဖြင့် အခြားဘဏ်များသို့ ငွေလွှဲလိုပါက မည်သည့်ဘဏ်ခွဲကိုမဆို သွားရောက်ပြီး ဘဏ်ခွဲကောင်တာများတွင် ဝန်ဆောင်မှု ရယူသည့်စနစ်ဖြင့် ငွေလွှဲခြင်းများ ဆက်လက်ဆောင် ရွက်နိုင်သည်။ ကမ္ဘောဇဘဏ်နှင့် ငွေလွှဲ၊ ငွေထုတ် လက်ခံမည့် အခြားဘဏ်များသည် မြန်မာနိုင်ငံတော်ဗဟိုဘဏ်၏ CBM-NET2 ငွေပေးချေမှုစနစ်အသစ်ကို အသုံးပြု၍ ယခင်ကထက် ပိုမို လျင်မြန်ထိရောက်စွာဖြင့် ဘဏ်ခွဲကောင်တာများတွင် ငွေလွှဲလုပ်ဆောင်မှုများ ဝန်ဆောင်မှု ပေးသွားမည် ဖြစ်ပါသည်။
လက်ရှိ ကိုဗစ်-၁၉ ကပ်ရောဂါ ကာကွယ်တားဆီးရေးအတွက် မိမိတို့ နေအိမ်တွင်သာ နေထိုင်ကြရန်နှင့် တစ်ဦးနှင့်တစ်ဦး ခပ်ခွာခွာနေထိုင်သွားလာကြရန် နှိုးဆော်တိုက်တွန်းသည့် အချိန်ကာလတွင် ‘Other Bank Transfer’ လုပ်ဆောင်ချက်ကို အသုံးပြုပြီး ဒစ်ဂျစ်တယ်စနစ်ဖြင့် ဘေးကင်းလုံခြုံစွာ ငွေလွှဲနိုင်ပြီဖြစ်သောကြောင့် customer များအနေဖြင့် ဘဏ်ခွဲများသို့ လူကိုယ်တိုင်သွားရောက်ရန် လိုအပ်သည့် ကိစ္စများကို လျှော့ချပေးနိုင်မည် ဖြစ်ပါသည်။
Other Bank Transfer လုပ်ဆောင်ချက်ကို အသုံးပြု၍ ပြည်တွင်းဘဏ်အချင်းချင်း ဒစ်ဂျစ်တယ်စနစ်ဖြင့် ငွေလွှဲနိုင်သည့် ဝန်ဆောင်မှုမှာ ဘဏ်ခွဲကောင်တာများတွင် ကောက်ခံသည့် ငွေလွှဲနှုန်းထား ပုံစံမျိုး မဟုတ်ပါ။ အဆိုပါ ဝန်ဆောင်မှု အသုံးပြုလိုသည့် customer များမှာ မြန်မာနိုင်ငံတော်ဗဟိုဘဏ်မှ ကောက်ခံသည့် ဝန်ဆောင်ခ (၃၀၀) ကျပ် နှင့် ငွေလွှဲလုပ်ဆောင်ချက် တစ်ကြိမ်လျှင် ကမ္ဘောဇဘဏ်မှ (ဝ.၀၅ ရာခိုင်နှုန်း) မှ (ဝ.၁၀ ရာခိုင်နှုန်း) အတွင်း ကောက်ခံသည့် ကျသင့်ငွေများကိုသာ ပေးဆောင်ရန် လိုအပ်ပါသည်။ ငွေလွှဲပေးပို့သူအနေဖြင့် ငွေလွှဲလက်ခံသူ၏ ဘဏ်မှ ကောက်ခံသော အဝင်ငွေလွှဲဝန်ဆောင်ခကို ပေးဆောင်ရန်လည်း လိုအပ်သည်။
ကမ္ဘောဇဘဏ်၏ iBanking ဖြင့် ‘Other Bank Transfer’ လုပ်ဆောင်ချက် အသုံးပြုပုံမှာ အောက်ပါအတိုင်းဖြစ်သည်။
(၁) ကမ္ဘောဇဘဏ်၏ iBanking ဝက်ဘ်ဆိုက်အား အင်တာနက် browser တစ်ခုတွင် ဖွင့်ပါ။
(၂) ဘယ်ဘက်ရှိ ဝင်ရောက်လိုသော နေရာများကို ပြသထားသည့် menu မှတစ်ဆင့် Other Bank Transfer ကို ရွေးပါ။
(၃) ငွေလွှဲလက်ခံမည့်သူ၏ ဘဏ်ကိုရှာပြီး ၎င်း၏ အမည်၊ ဘဏ်အကောင့် အသေးစိတ်အချက်အလက်နှင့် ငွေလွှဲမည့် ပမာဏကို ရိုက်ထည့်ပါ။
(၄) ငွေလွှဲလုပ်ဆောင်ချက်အား ပြန်လည်စစ်ဆေးပြီး ငွေလွှဲလက်ခံမည့်သူ၏ အသေးစိတ်အချက်လက်များ မှန်ကန်ပါက “Submit” ကို နှိပ်၍ အတည်ပြုပါ။
(၅) SMS စာတိုမှတစ်ဆင့် ပေးပို့လိုက်သည့် တစ်ခါသုံးလျှို့ဝှက်နံပါတ် OTP အား ရိုက်ထည့်ပါ။
(၆) SMS စာတိုမှတစ်ဆင့် ပေးပို့လာမည့် ငွေလွှဲလုပ်ဆောင်ချက် အတည်ပြုခြင်းအား ၁၀ မိနစ်ခန့် စောင့်ဆိုင်းပါ။

Photo Source https://www.facebook.com/KanbawzaBank

ကမ္ဘောဇဘဏ်၏ mBanking ဖြင့် ‘Other Bank Transfer’ လုပ်ဆောင်ချက် အသုံးပြုပုံမှာအောက်ပါအတိုင်းဖြစ်သည်။
(၁) ကမ္ဘောဇဘဏ်၏ mBanking အက်ပလီကေးရှင်းအား ဖွင့်ပါ။
(၂) ပင်မစာမျက်နှာတွင် Other Bank Transfer လုပ်ဆောင်ချက်အား ရွေးပါ။
(၃) ငွေလွှဲလက်ခံမည့်သူ၏ ဘဏ်ကိုရှာပြီး ၎င်း၏ အမည်၊ ဘဏ်အကောင့် အသေးစိတ်အချက်အလက်နှင့် ငွေလွှဲမည့် ပမာဏကို ရိုက်ထည့်ပါ
(၄) ငွေလွှဲလုပ်ဆောင်ချက်အား ပြန်လည်စစ်ဆေးပြီး ငွေလွှဲလက်ခံမည့်သူ၏ အသေးစိတ်အချက်လက်များ မှန်ကန်ပါက “Submit” ကို နှိပ်၍ အတည်ပြုပါ။
(၅) အသုံးပြုသူ မှန်ကန်ကြောင်း အတည်ပြုရန်အတွက် mBanking PIN နံပါတ် ရိုက်ထည့်ပါ။
(၆) SMS စာတိုမှတစ်ဆင့် ပေးပို့လာမည့် ငွေလွှဲလုပ်ဆောင်ချက် အတည်ပြုခြင်းအား ၁၀ မိနစ်ခန့် စောင့်ဆိုင်းပါ။

Photo Source https://www.facebook.com/KanbawzaBank

ကမ္ဘောဇဘဏ်၏ mBanking အက်ပလီကေးရှင်းအား Google Play Store နှင့် Apple App Store တွင် ဒေါင်းလုတ် ရယူနိုင်ပြီး iBanking ဝက်ဘ်ဆိုက်အား https://ibanking.kbzbank.com/ မှတစ်ဆင့် အသုံးပြုနိုင်ပါသည်။ ကမ္ဘောဇဘဏ် ဝန်ဆောင်မှုအသုံးပြုသူများအနေဖြင့် eBanking နှင့်ပတ်သက်ပြီး အသေးစိတ် ပိုမိုသိရှိလိုပါက https://www.kbzbank.com/mm/i-banking-2/ တွင် ဝင်ရောက် ကြည့်ရှုလေ့လာနိုင်သည့်အပြင် ကမ္ဘောဇဘဏ်၏ Customer Service Department ဖုန်းနံပါတ် +၉၅၉၉၅၁၀၁၈၅၅၅ သို့ ဆက်သွယ်၍ မေးမြန်းစုံစမ်းနိုင်သည်။