AI ဘာသာပြန်မှုတွေအတွက် ထည့်သွင်းလာတော့မယ့် Google ရဲ့ Contextual Translation လုပ်ဆောင်ချက်အသစ်
AI နည်းပညာတွေပိုပိုပြီးတိုးတက်လာသလို စီးပွားရေးလုပ်ငန်းတွေ၊ အင်တာနက်နဲ့သက်ဆိုင်တဲ့ လုပ်ငန်းတွေမှာ AI တွေကအတော်လေးနေရာယူလာနေကြပါပြီ။ အရင်က AI ကိုအသုံးမပြုကြတဲ့နေရာတွေမှာတောင် အသုံးပြု လာကြတဲ့ အတွက် အရင်ကတည်းက AI ကိုအသုံးပြုနေကြတဲ့ အလိုအလျောက် ဘာသာပြန်ပေးတဲ့ စနစ်လို နေရာတွေမှာ AI တွေနဲ့ စွမ်းဆောင်ရည်ကပိုပိုပြီး တိုးတက်မှန်ကန်လာတာကိုလည်း လစ်လျူရှုထားလို့ မရပြန်ပါဘူး။
ဖေဖော်ဝါရီလ ၈ ရက်နေ့ ပဲရစ်မြို့မှာ ကျင်းပခဲ့တဲ့ AI အဓိကထားကျင်းပတဲ့ event တစ်ခုမှာ Google အနေနဲ့ Google Translate ကိုလည်း Update တွေလာဖို့ရှိကြောင်းပြောကြားခဲ့ပါတယ်။ လက်ရှိမှာလည်း Contextual Translation လို့ခေါ်တဲ့ ကိုယ်ရှာဖွေဘာသာပြန်လိုက်တဲ့ အကြောင်းအရာတစ်ခုပေါ်မူတည်ပြီး ဆက်စပ် ဘာသာပြန်ပေးတဲ့ လုပ်ဆောင်ချက်ကို Google အနေနဲ့ စမ်းသပ်နေပါတယ်။
Contextual Translation ဟာ AI အသုံးပြုပြီး ဘာသာပြန်ပေးတဲ့စနစ်တွေအတွက် အတော်လေးတိကျတဲ့ ဘာသာပြန်ဆိုမှုတွေ ဖြစ်လာနိုင်ပါတယ်။ အထူးသဖြင့် ဘာသာစကားတစ်ခုကို အခုမှ စတင်လေ့လာနေသူတွေ အနေနဲ့ ကိုယ်ရှာလိုက်တဲ့ စကားလုံးနဲ့ သက်ဆိုင်တဲ့ စကားလုံး၊ အခြားအဓိပ္ပာယ်တွေကို တစ်ခါတည်း ဖော်ပြပေးမှာ ဖြစ်သလို ကိုယ်ပြောချင်၊ ဆိုလိုချင်တဲ့ အဓိပ္ပာယ်ရောက်အောင်လည်း ကူညီဆောင်ရွက်ပေးမှာ ဖြစ်ပါတယ်။
Image: Google
ပုံမှာဖော်ပြပေးထားသလိုပဲ “novel” ဆိုတဲ့စကားလုံးအတွက် မတူညီတဲ့အဓိပ္ပာယ်သုံးခုကို အင်္ဂလိပ်လို “a piece of fiction, something new, or something unique” လို့ဖော်ပြပေးထားသလို ပြင်သစ်လို ဘာသာပြန်လိုက်တဲ့အခါမှာတော့ “novel, nouveau နဲ့ original” ဆိုပြီး အဓိပ္ပာယ်အသီးသီးဖော်ပြပေးမှာ ဖြစ်ပါတယ်။ ဒီလုပ်ဆောင်ချက်တွေဟာ ဘာသာပြန်နေသူတွေ၊ ဘာသာစကားကို စတင်လေ့လာနေသူတွေ အတွက် အတော်လေးအထောက်အကူဖြစ်မယ့် လုပ်ဆောင်ချက်တစ်ခုလို့လည်း ဆိုနိုင်ပါတယ်။
Contextual Translation လုပ်ဆောင်ချက်ကတစ်ဆင့် Google အနေနဲ့ အင်္ဂလိပ်၊ စပိန်၊ ပြင်သစ်၊ ဂျပန်နဲ့ ဂျာမနီဘာသာစကားတွေကို ဘာသာပြန်တဲ့အချိန်မျိုးမှာ စကားလုံးတစ်ခုချင်းစီရဲ့ အဓိပ္ပာယ်တွေကို ဖော်ပြပေးနိုင်မှာ ဖြစ်ပါတယ်။ အခြားဘာသာစကားတွေအတွက်လည်း လအနည်းငယ်အတွင်း အသုံးပြုနိုင်အောင် ပြုလုပ်ထည့်သွင်းသွားပေးမယ်လို့ သိရပါတယ်။ Google ရဲ့ Contextual Translation update ကို နောက်ရက်သတပတ်အတွင်း ချပြပေးသွားမှာဖြစ်သလို ဒီနှစ်ထဲမှာပဲ နောက်ထပ်ဘာသာစကား ငါးမျိုးကိုထည့်သွင်းပေးသွားဦးမယ်လို့ ဆိုပါတယ်။
မကြာသေးမှီကဘဲ Google အနေနဲ့ Google Lens ကို AR Translate Lens အသစ်တစ်ခုလဲလိုက်ပါသေးတယ်။ ဒီလိုလဲလိုက်တဲ့အတွက် Pixel ရဲ့ Magic Eraser Technology ကိုအသုံးပြုပြီး စာသားတွေဖျက်တာတွေ၊ မူရင်းအတိုင်းဘာသာပြန်ထားတဲ့စာသားကို Original Style အတိုင်းထည့်ပေးတာ စတဲ့လုပ်ဆောင်ချက်တွေကို လုပ်ဆောင်ပေးမှာ ဖြစ်ပါတယ်။
နောက်နှစ်အနည်းငယ်အတွင်းမှာ AI နည်းပညာတွေအသုံးပြုထားတဲ့ ဘာသာပြန်စနစ်သစ်ကိုအသုံးပြုပြီး ဒီထက်ပိုပြီး မြန်ဆန်တိကျတဲ့ ဘာသာပြန်ဝန်ဆောင်မှုတွေကို အသုံးပြုနိုင်လိမ့်မယ်လို့ Google အနေနဲ့ပြောကြားခဲ့ပါသေးတယ်။
